Nr. 327 Dr Schorsch vrzählt vom 24. Oktober 2022
Nemme lang, nâ isch dr Schorsch Rentner, ond seit dera Woch’ macht’r sich Sorga. Seither isch’r drvo ausganga, dass die Menschheit jeda Tag a klois bissle klügr wird. Des hât sich jetzt radikal vrändert. So a Geistesgröße von dene radikale Viecherfreund „PETA“ hât naus plärt, wenn’s nâch ihm ganga dät, nâ dürfet fleischessende Männr koine Kender me zeuga. Wie’r des omsetza will hât’r zwar net gsagt – ond mr will es sich beim beschta Willa au net vorstella (grad als Mâ). So gibt’s en Deutschland grad âmol knapp acht Milliona Vegetarier, ond so übr dr Dauma send di Hälfte Fraua. Ond jetzt kommet dia Sorga vom Schorsch, weil wenn jetzt bloß no dia vegetarische Kerle Vatr werda dürfat, nâ wird’s eng mit dr Rente. Abr, wia mr so hört, gibt’s an Uffschroi em Land, ob dera vrblödeta Idee.
Also isch dia Chance groß, dass sich dia Männer au künftig net zwischa Baby, Sex ond Schnitzel entscheida müssat.
 guate Woch’ ond em Herrgott sein Sega.
