Nr. 326 Dr Schorsch vrzählt vom 22. Oktober 2022
Übr dia weisen Beschlüss’ dr politischen Elite hât sich dr Schorsch an dera Stell’ scho hin ond wiedr seine Gedanka gmacht. Ond als vorbildlichr Ondertan hât er uff manches au sofort entsprechend reagiert. So isch dr Wäschlompa ja entzwischa sei Kretschmann-Alternativ zom Duscha, ond weil dr Schorsch drbei au no beim Wäschwascha spara will, hat’r des Ganze no optimiert: Er nemmt zwoi Wäschlompa, oin mit ma „A“ druff ond dr andere mit „G“. So send die Wäschlompa dene onderschiedliche Körperregiona exakt zuagordnet ond er kâ se so au wochalang benutze. Dia Bezeichnonga send drbei so eideutig, dass es koin Vrwechslung zulässt: „A“ isch natürlich fürs Angesicht, ond „G“ fürs Gesäß.
Bei äller Bereitschaft, dia politische Vorgaba ond Empfehlonga gewissahaft omzomsetza, mit oinr duat’r sich schwer, ond er isch froh, dass’r net em Schtuagartr Râthaus schafft. Weil dort wellet se bsonders gendergerecht sei, ond henn jetzt au uff de Männertoiletta Tampon-Automata uffgehängt. Dr Schorsch hât rom ond nom üblegt, abr beim besta Willa hât doch tatsächlich übrhaupt koi Vorstellung, wia’r dia Denger als Mâ einsetza soll. Vielleich hât oiner von Euch a Idee.
 guate Woch’ ond em Herrgott sein Sega.