Nr. 445: Dr Schorsch vrzählt vom 10. Oktober 2026
Ach was hemmr für â scheene Sprâch, di au no so wundrbar ologisch isch. „Könnscht mâl langsam schneller fahra“, „Kommad, mir gangad“ odr „Komm, gang mr doch weg“, des gibt’s sicherlich en koim andra Dialakt. Aber au des hât an bsondra Reiz, wenn mr ebbes „â klois bissle größer macha“ sott. Gern hört mr als Schwâb en launigr Runde mit ma Weiglas vor sich: „Trink’ des mâ voll leer“, „weil s’pressiert langsam“. Dâ send mr jetzt scho wiedr bei Wörtr, vor dene sich Auswärtige fascht scho fürchta müsse, odr glaubet ihr, s’dät oinr, dr net mit dr schwäbischa Geburt gsegnet isch, wissa, was „Zammaananandrnâschnuggla“ ond „Dumeianminâschlupferle“ bedeutet? Beim Überlega därf mr dia Reigschmeckte fei net ablenka, sonst müsst mr se ja frâge: „Iridieridie?“
Jetzatle, sodele ond net vrgessa: „Heut’ isch Samschdig, dâ gâht mir naus zom Kandl kehra.“ Bevor dr Schosch jetzt „au oüberlegt saudomm rausschwätzt“ wünscht’r â guate Woch’ ond em Herrgott sein Sega.
