Was isch eigentlich mit den Leut’ los. D’Sonn’ schein ra wia vrrückt ond uff de Wiesa ond de Gärta, dâ blüht’s, dass oim’s Herzle hopfa kennt. Ond die Leut’ werdat emmer narrischr, grad beim Eikaufe – em Suprmarkt, mit Eikaufswägala.
Mr kâ’s kaum glauba, wia mit dene Wägala, besonders, wenn se schwer belade sind, randaliert wird. Dass mr in dene enge Einkaufsgäng gelegentlich en d’Wada grammt kriagt, des ghört jâ fascht scho zur Normalität, dass abr an dr Kass’ in der Schlang, aus de Gäng heraus richtige Scharmützl gefahra werdet – des isch neu. Dâ gibt’s nâ dia sture Hond, dia älles ond jeden ignorierat, wenn se demonstrativ nâch vorne glotzat, ihr Wägle emmer â bissle meh’, ond nomâl bissle mehr en die Warteschlang neidruckat ond am End zwar jessasmäßig viel Zorres bei de andere erzeugt henn, abr emmerhin zwoi Plätz gwonna henn. Mr kennt brülla vorn Zorn, wenn mr net so ânständig erzoga worda wär. Trotzdem â guate Woch’ ond em Herrgott sein Sega.