Mr kennt moina, onser Dialekt dät emmr meh’ dr Bach na ganga. Ja Pfeifadeggl, solang’s no so scheene Wörter gibt, isch’s am Schorsch net bang, mr muss se halt au saga. Beim trenka von ra Schnitzbria oder Muggafugg lässt sich trefflich drüber nâchdenka, wia mr dene Driebel, wo not net so lang her en Seggeles Lada g’hengt send des näher brenga kâ. Mr muas jâ net glei mit denen rombuâbla ond se schalu macha. Beweget mr se oifach zom mâl â mâl â Mâle, wenn se uff Bsuch bei dr Âhne send. Mr muas streng drbei bleibe, au wenn se manchmâl recht bähmullig send, ond mr moina kennt dene g’hört dr Dippl bohrt. Wenn erst a Fiddzele vom Dialekt âmol sich bei den Jonge eingrabe hât, na bleibt der auch bäbba. Na werdet mr onser Freud’ han, wenn se em trüaba Licht von ra Fonzel, sich mit em Pädderla an Stomba âzendet ond nach oinige Gläser Semsakrebslr an rechte Balla henn, was am End’ an âständiga Hägger brengt. Â guate Woch’ ond em Herrgott sein Sega.
