Nr. 390 Dr Schorsch vrzählt vom 14. Dezember 2024

Was für a Erlebnis. Dâ hât dr Schorsch erst âmol ens aluminium-blonde Altr komma müssa, bis’r dr erste Champions-League-Kick von seine Lieblingskickr mit dem rota Brustring hât sehe könna. Mit 59.999 andre zusamma des beim ma Flutlichtspiel zom Seha, ond dann au no übrragend gwonna, heidanei, des war scho übrragend. Jetzt sott mr jâ moina, dass onsr Landeshauptstädtle uff so Ereignis als selbst ernannte Sportstadt ganz prima vorbereitet isch. Weit gfhelt. Di Âreis mit’m Auto (Stichwort: Arthrose en de Knie) hât sage ond schreibe meh wia zwoi Stond dauert, weil mr per Navi kurz vorm Parkhaus wegra a Absperrung net neikomma isch. Also zrück nâch Cannstatt ond uff’m Wasa parkt. Ganz knapp zur CL-Hymne hât’s dr Schorsch uff sein Platz geschafft. Ond hoimzuas? Wieder fast zwoi Stond hât’s dauert, bis mr aus’m Parkplatz rauskomma isch, ond letztendlich am halber Zwoi seelig im Bett glega isch.

 guate Woch’ ond em Herrgott sein Sega.